Агенцијата за туризам најавува пораст на бројот на туристи преку нови авио линии на охридскиот аеродром. Со воведувањето на директен лет Охрид-Белград, кој стартува од месец јуни се очекува да се удвои бројот на ноќевања на српските туристи, кој во текот на минатата година беше зголемен за 40 %.
Ер Србија ќе лета 4 пати неделно, по примамливи цени. Ќе има и чартер лет Измир Охрид, а тур операторите веќе најавуваат зголемување на летовите за оваа сезона.
-„Фокусот повторно ќе биде на регионалните пазари кои треба да ги стабилизираме очекуваме помеѓу 10 до 15 % дополнително секундарните пазари помеѓу 30 и 40 % раст. Односно 2023 та година заеднички со засукани ракави верувам дека ќе успееме да ја надминеме бројката од 3,2 милиони ноќевања и сериозно да се приближиме до пола милијарда трговски да кажеме или туристички импакт“, вели Љупчо Јаневски директор на АППТ.
Оваа година се очекува зголемување на бројот на туристи и од европските и азиските земји, и повеќе кружни тури на Балканот, во кои Охрид е неизбежна дестинација.
-„Очекуваме 2023 година да имаме поголем број групи од поразлични дестинации, групи од егзотични дестинации односно за нив Балканот е егзотично место, како и минатата година што можевме да препознаеме португалски, шпнаски, мексикански, бразилски и тоа токму во Охрид кои што ќе бидат на еден до два дена. Се надеваме се повеќе и повеќе кружни патувања од дестинации кои што досега не не посетувале“, додава Јаневски.
Една од целите на македонскиот туристички сектор за 2023 година е бројот на ноќевања од стратешките туристички пазари да биде поголем дури и во однос на претпандемиската 2019 година, која се смета за рекордна година во туризмот.
Новинар Соња Рилковска