Извештајот за природното и културно наследство на Охридскиот Регион, кој владата го достави до Унеско не кореспондира со реалната состојба, реагираат граѓанските организации од Охрид, Струга и Поградец. Извештајот е обичен препис направен и поднесен до УНЕСКО. Многу аспекти од овој извештај не се точни и не ја отсликуваат вистинската состојба. Од 19 клучни препораки на Унеско, реализирани се само четири и тоа нецелосно само делумно, велат невладините.
-„Неконтролираната урбанизација е спомната со четири реченици, а тоа е голем проблем кој се случува во Националниот парк Галичица а спомнат е некојси црвен елен кој што е таму појавен на половина страна. Значи урбанизацијата која е голем проблем е занемарена. Има и точни работи кои се спомнати, но има и големи пропусти и погрешни се со цел да се одвлечи вниманието на јавноста од овие проблеми“, вели Никола Киселинов од Туристичката асоцијација „Билјана“, Охрид.
Преставниците на шеснаесет невладини организации од земјава велат дека ова не е првпат да се поднесува ваков извештај, а клучниот проблем е што државата нема комуникација со невладиниот сектор иако тоа е според препораките на УНЕСКО.
– „ Голем проблем е и заштитата на Охридското езеро и човечкото влијание врз екосистемот. Ние како невладина секогаш ќе го застапуваме интересот на граѓаните, и формиравме една стратегија за комуникација која е препорака од страна на УНЕСКО, но интересот на Владата и другите институции не е таков како што треба да биде“, вели Ндерим Положани од невладината Капс Струга.
Археологот Сашо Кироски од Асоцијата за заштита на природното и национално богатство вели во последните 15 години не е направен ниту еден проект од страна на Завод и Музеј Охрид, а нема ниту едно археолошно научно истражување иако сето тоа е предвидено со проект планот на УНЕСКО што треба да се спроведе до 2029 година.
-„ Се срамам кога ние чекаме да дојдат од УНЕСКО и да ни кажат што треба да правиме со најстарото езеро во Европа и светот. Зарем толку имаме еден грам капацитет за да можеме да го заштитиме Езерото.Цело време чекаме други да ни кажат а ние не знаеме да застенеме и да си го средиме отпадот кој го имаме“, вели Кироски.
Според Аријан Мероли, истражувач и експерт за заштитени подрачја, потребна е соработка на сите инволвирани во регионот оти со двете мисии на УНЕСКО во 2017 и 2020 година има голем број забелешки, 19 препораки за кои до денес не се преземни никакви мерки.
-„ На македонска страна најдобра иницијатива е враќањето на реката Сатеска во старото корито. Меѓутоа за другите проблеми конкретно до сега ништо. Не знам што има во Планот за ревитализација за кој требаше да се дискутира со сите актери во регионот“, вели Мероли
Невладините велат дека не се запознаени ниту со Планот за ревитализација, а најавија дека ќе бараат од Владата да се почитува и Стратегијата за комуникација од македонска и албанска страна за да има транспарентност и резултати во заштитата.
Новинар Соња Рилковска