Еден донор утрово спаси четири животи. Првпат во историјата на македонското здравство, утрово од еден дарител беа експлантирани четири органи во еден акт. Благодарение на хуманоста на едно семејство, нивната љубов, добрина и емпатија која ја носат во себе, рано утрово ново срце почна да чука во градите на 40 годишен пациент од Скопје. Нова шанса за живот и црн дроб доби пациент со хронична црнодробна болест, а двајца пациенти на дијализа во текот на денот ќе добијат бубрези. Дополнитено шанса за поквалитетен живот наредниве денови ќе добијат пациенти со коскени заболувања.
-„Уште еднаш благодарност до семејството на донорот кои со нивната несебична одлука ни донесоа утро полно надеж и верба во безусловна добрина.Благодарност до сите медицински тимови кои изминативе 24 часа работеа и се уште работат на скопските хируршки и интерни клиники.
На пациентите кои добија органи им посакуваме брзо опоравување. Горди сме на секој нов успех во македонското здравство.Сочувство до семејството на донорот, а на пациентите им посакуваме побрзо закрепнување“, пишуваат од министерството за здравство.
Националното здружение „Храбро срце“ честита на надлежните за овој потег и уште еднаш повикуваат за логистичка поддршка од Владата.
-„Секоја чест и за целокупниот медицински персонал што ги извршува трансплантациите.
Пациентите од НЗ ,,Храбро срце” не ја губат надежта дека во скоро време, по долги години чекање, и тие ќе добијат втора шанса за живот.
Воедно, уште еднаш го споделуваме апелот за логистичка поддршка од Влада на Република Северна Македонија за обезбедување транспорт“, пишуваат од Здружението „Храбро срце“.