Се разгоре поетскиот оган. Со музичко перформанс и спектакуларен огномет синоќа свечено беше отворена најстарата поетска манифестација во земјава. 62. издание на фестивалот „Струшки вечери на поезија“ се одржа на платото пред Домот за култура „Браќа Миладиновци“ во присуство на бројни странски и домашни поети, како и на владини претставници и љубители на пишаниот збор.
Поетската порака ја испрати македонскиот поет Милован Стефановски, кој рече Струга е светска престолнина на поезијата. Последната недела од август за поетите од сите меридијани сите патишта водат во Градот на мостовите.
–„ Ако само за миг замислиме, а имагинацијата е непрегледно бескраен небесен океан, дека е можно овде, во една ваква августовска вечер, одеднаш да бидат присутни сите што доаѓале во изминатата повеќе од шестдецениска традиција на СВП, сигурно дека би добиле население колку за уште една Струга. Би добиле неверојатно преклопување на стапките по тротоарите и патеките од двете страни на Дрим на многу познати и признати светски поетски имиња и стожерни великани (Рафаел Алберти, Лу Јуан, Андреј Вознесенски, Ежен Гилвик). Нивните стапки се преклопуваат со стапките на нашите македонски поетски гордости (Блаже Конески, Ацо Шопов, Матеја Матевски, Анте Поповски)“, – истакна Стефановски.
Министерката за култура Бисера Костадиновска – Стојчевска во своето обраќање рече во овој живот полн со предизвици поезијата е чувствотворност која не разликува во оваа ера на бесчуствителната роботизација.
– „Ехото на Миладиновци е присутно и денес. И од година во година е сè погласно. Продолжи тоа ехо благодарение и на Струшките вечери на поезијата, создадени по промислата на величествените македонски современи автори чија визија нè крепи и по децении од нивното заминување. „Ние си одиме, а земјата останува“ – напиша чувствотворниот Блаже Конески и со својата скромност не допиша дека и делата остануваат“, истакна Костадиновска – Стојчевска.
Отворањето синоќа продолжи со поетското читање Меридијани, на кое настапија повеќмина автори од земјава и од странство. Во следните фестивалски денови „Струшките вечери на поезијата“ ќе бидат домаќин на 25 поети од странство и 40-тина од државата.
Манифестацијата, ќе трае до 28 август, а годинава се одржува под мотото „Чувствотворен јазик“.
Новинар Соња Рилковска