Тажно во Вевчани, откажана музиката поради смртта на 19 годишно момче

Забавниот дел од Вевчанскиот карневал, е откажан поради смртта на млад жител на Вевчани. Градоначалникот на Општина Вевчани Спасе Кочовски рече дека дефилето со маски, ќе се одржи во некоја минимална форма.

„Поради трагедијата што се случи сношти во Вевчани, во сообраќајна несреќа ни загина млад жител на Вевчани, улиците на Вевчани на 13 јануари никогаш не биле во ваква состојба, празни се, скоро и да не забележав маскирано лице. Вевчани е мало место, сите сме како една фамилија. Вечерашниот концерт е откажан, забавниот дел го откажав, мислам дека нема да има учесници. Имавме средба со василичарското друштво од Горна и Долна маала, дефилето ќе се одржи во некоја минимална состојба, кој ќе учествува не можам да кажам. Вака никогаш не било“, кажа градоначалникот Кочовски.

Министерката за култура Бисера Костадиновска Стојчевска, која денеска е во Вевчани, изрази жалење за немилиот настан и рече дека традицијата ќе продолжи следната година.

„Не го препознавам Вевчани вакво. Првин да изразам сочувство за фамилијата, јас за жал знам како изгледа таа болка. Знам дека цела ситуација е неизвесна. Ќе се случува она што ќе одлучат граѓаните на Вевчани. Традицијата ќе продолжи наредната година“, кажа таа.

Од полицијата кажаа дека ноќеска, околу 1.20 часот, автомобил со вевчански регистарски ознаки, управуван од М.М. (19) од Вевчани, излетал од регионалниот пат кон Вевчани, во близина на село Подгорци, струшко. Возачот загинал во несреќата. Станува збор за синот на поранешниот пратеник Крсто Мукоски.

Вевчанскиот карневал се одржува на Василица и е еден од најпознатите на Балканот, а се верува дека е стар 1.400 години. Во 1993 година, Вевчанскиот карневал официјално стана дел од Светската федерација на карневалски градови.

Social profiles

Охрид

Струга

Вевчани