Здружението на лица со дијабет од Охрид, во соработка со НУ Библиотека „Григор Прличев“, во четврток (26 февруари) организира едукативна средба со професионалните нутриционисти Наум Костов и Билјана Трајчевска – НутриДуо, двајцата од Охрид.
Темата на настанот е особено актуелна: „Науката и трпезата: микробиомот во време на пост“, при што ќе се зборува за влијанието на постот врз здравјето, балансот на микробиомот и правилниот избор на храна кај лица со дијабет, но и кај пошироката популација.
Средбата ќе се одржи во читалната на Библиотеката со почеток во 16:45 часот и е отворена за сите заинтересирани граѓани.
Организаторите ги повикуваат сите кои сакаат да добијат стручен совет и научно засновани информации за исхраната во период на пост да присуствуваат на настанот.