Скопје/Охрид, 25 февруари 2026 – Македонската поштенска историја денес испиша уште една златна страница. Од печат официјално излезе осмата поштенска марка посветена на децата со Спинална мускулна атрофија (СМА) – симбол на една долготрајна и нескршлива борба за живот и препознавање на реткоста.
Преку овој проект, Македонија веќе осум години по ред, во месецот на ретките болести, го потврдува својот статус како прва и единствена земја во светот која преку поштенските марки ја пренесува пораката на овие храбри деца.
Иницијативата е на Гордана Лолеска, вработена во АД Пошта на Северна Македонија и претседател на здружението „Ретко е да си редок“ од Охрид. Таа својата професија ја претвори во алатка за општествена одговорност, а нејзиниот личен придонес за заедницата со СМА стана препознатлив и надвор од границите на земјата.
„Секоја марка што ја издаваме е ветување дека овие деца нема да бидат заборавени. Како вработена во Пошта, горда сум што мојот професионален дом стана засолниште на хуманоста. Овие 8 марки се нашиот заеднички крик дека ‘Ретко е да си редок’, но токму во таа реткост лежи најголемата сила. Македонија денес повторно е пример за целиот свет,“ изјави со емоција Лолеска.
Оваа серија поштенски марки низ годините стана мост меѓу институциите и граѓаните, докажувајќи дека секоја испратена пратка со оваа марка е глас за поддршка, надеж и подобра иднина за децата со СМА.
Свечената промоција ќе ја организира здружението „СТОП СМА Македонија“ во сабота (28 февруари), во EU House Скопје, со почеток во 16:30 часот.