На дневен ред на 18. седница на Советот на Општина Охрид се 60 точки, меѓу кои извештајот за остварувањето на општинскиот буџет, работата на јавните претпријатија, реализацијата на капиталните инвестиции и измените и дополнувањата на Буџетот за 2026 година.
Осумнаесеттата седница на Советот на Општина Охрид ќе се одржи на 13 ноември (петок), со почеток во 9 часот, во зградата на Општина Охрид. Седницата ја свикува претседателот на Советот, Перчо Божиновски.
Советниците ќе расправаат за обемна агенда од 60 точки, при што значителен дел се однесуваат на извештаите за реализација на програмите и работењето на општинските јавни претпријатија за изминатиот период.
На дневен ред се извештаите за работењето на ЈП „Билјанини Извори“, „Водовод“, „Градски гробишта“, „Градски пазар“, „Нискоградба“ и „Охридски Комуналец“, за периодот од јули до септември годинава.
Советниците ќе ја разгледуваат и реализацијата на програмите во областа на туризмот, локалниот економски развој, културата, спортот, образованието, детската заштита, здравствената и социјалната заштита, како и заштитата на животната средина.
Посебен интерес привлекуваат извештаите за реализацијата на капиталните инвестиции во основното и средното образование, детската заштита, изградбата и реконструкцијата на локалните патишта и улици, водоснабдителните и канализациските системи, како и изградбата на катната гаража.
Меѓу поважните точки е и извештајот за остварувањето на Буџетот на Општина Охрид за периодот од 1 јануари до 30 септември 2026 година.
Во продолжение на седницата се предвидени и измени и дополнувања на повеќе годишни и развојни програми на општината, а на дневен ред е и Предлог-одлуката за измени и дополнувања на Буџетот на Општина Охрид за 2026 година, односно ребалансот на буџетот.
Седницата ќе заврши со разгледување на Предлог-одлуката за донесување на буџетски календар.