Фондот за здравствено осигурување ги засилува контролите во здравствените установи со кои има склучено договор, со цел да спречи неоснована наплата на здравствени услуги и евентуална двојна наплата – од Фондот и од пациентите за иста услуга.
Контролите ќе опфатат проверка дали здравствените установи ги почитуваат договорните обврски и законските прописи, особено во делот на услугите што се покриени со задолжителното здравствено осигурување.
Од Фондот потсетуваат дека осигурениците не треба да плаќаат дополнителни износи за здравствени услуги што се на товар на Фондот, освен законски утврдената партиципација, доколку таа е предвидена за конкретната услуга.
Проверките ќе се однесуваат на примарната, секундарната и терцијарната здравствена заштита, а особено внимание ќе се посвети на усогласеноста меѓу извршените и фактурираните услуги, како и на износите што им се наплатуваат на пациентите.
Здравствените установи имаат обврска на видно место да ги истакнат информациите за висината на партиципацијата и за секое извршено плаќање да издадат соодветен законски доказ.
Од Фондот апелираат до осигурениците да пријават доколку располагаат со информации за неоснована наплата на здравствени услуги. Пријавите може да се достават до Секторот за контрола на Фондот, при што ќе биде заштитена приватноста на подносителите и нивните лични податоци.
Доколку бидат утврдени неправилности, ќе следуваат соодветни мерки согласно договорите со здравствените установи и важечките прописи.