Од денес започнува Страсната недела, последната и најзначајна седмица пред празникот Велигден, посветена на страдањата на Исус Христос.
Во текот на оваа седмица, верниците се потсетуваат на последните денови од земниот живот на Христос – од неговото влегување во Ерусалим, преку предавството, судењето и распнувањето, до неговото воскресение.
Секој ден од Страсната недела носи посебно значење, а кулминацијата е на Велики Петок – денот на Христовото распнување, кој се одбележува со строг пост и молитва. Веднаш по него следува Велика Сабота, како подготовка за најголемиот христијански празник – Велигден.
Свештенството повикува верниците овој период да го поминат во смирение, покајание и духовно прочистување, преку пост, молитва и присуство на богослужбите.
Страсната недела претставува време кога се засилува духовниот живот, а храмовите низ земјава традиционално се исполнуваат со верници кои ја следат оваа света седмица.
Велики понеделник – почеток на најсветите денови пред Велигден
Со денешниот ден започнува Велики понеделник, првиот ден од Страсната седмица, која е посветена на последните денови од земниот живот на Исус Христос.
Овој ден во православната традиција е симбол на покајание, духовно очистување и подготовка за Христовото воскресение. Верниците се повикуваат на пост, молитва и смирение, како вовед во најтешките, но и најзначајни денови од христијанската вера.
Во црквите се одржуваат богослужби, а се читаат евангелски текстови кои потсетуваат на поуките за верата, трпението и праведноста.
Велики понеделник го означува почетокот на духовното патување кон Велигден, празникот на победата на животот над смртта.