Во врска со Проектот „Јакнење на општинските капацитети за имплементација на проекти“ имплементиран од страна на UNDP со финансиска поддршка на Шведската Амбасада во Скопје и Бирото за регионален развој, со партнерство во проектот на Министерство за локална самоуправа и ЗЕЛС, Општина Охрид со UNDP потпиша: Договор за грант во износ од 3.418.650,oo денари за имплементација на проектот “Изработка на урбанистички и основен проект за затворање, рехабилитација и понатамошна грижа за некласифицираната и нестандардна депонија Буково”.
На овој начин општина Охрид ги подобрува општинските капацитети за имплементација на инфраструктурни проекти во насока на интегрирано планирање на локалниот развој и заштита на животната средина, информира секретарот Александар Китески.
Денеска градоначалниците на единаесет општини: Градско, Крушево, Македонски Брод, Новаци, Пехчево, Студеничани, Теарце, Чашка, Чаир, Охрид и Штип ги потпишаа договорите за грантови во износ од 350.000 американски долари.
Средствата се од Фондот за техничка документација и наменети се за изработка на 15 комплети техничка документација за подготовка и спроведување на приоритетни локални инфраструктурни проекти.
До крајот на тековната фаза на проектот ќе се инвестираат околу 3 милиони американски долари во подготовка на над 130 комплети техничка документација. Досега проектот има поддржано 90 вакви комплети – многу од нив се реализирани преку различни национални и меѓународни механизми за финансирање.