Општина Вевчани исплати еднократна парична помош за полуматурантите во општината, како дел од традиционалната поддршка за младите ученици.
Градоначалникот Спасе Кочовски соопшти дека денес е реализирана исплатата на паричниот надомест, кој оваа година изнесува 3000 денари за секој полуматурант.
– Денес е извршена исплатата на еднократна парична помош за полуматурантите од нашата општина. Како мал знак на признание и поддршка, Општина Вевчани и оваа година, и покрај скромниот буџет, одвои средства за паричен надомест за секој полуматурант – истакна Кочовски.
Од општината нагласуваат дека оваа мерка има за цел да ги поддржи младите во нивниот образовен пат и да претставува поттик за понатамошни успеси.
-Ви го честитам успешно завршеното основно образование!
Зад вас остануваат многу спомени, другарства и убави моменти поминати во училишните клупи.
Ви претстои пат исполнет со нови знаења, соништа и цели кои ве очекуваат да ги остварите.
Бидете вредни и истрајни, верувајте во себе, негувајте ги вистинските вредности и секогаш гордо носете го името на Вевчани каде и да ве одведе животниот пат! Среќна полуматура и многу успех во понатамошното образование, честита Кочоски.