Со обемен дневен ред од 95 точки, во понеделник, 31 август, со почеток во 9 часот ќе се одржи 14. седница на Советот на Општина Охрид. Седницата ќе се одржи во зградата на Општина Охрид.
На дневен ред се повеќе тематски целини – од извештаи и програми на основните и средните училишта и детската градинка, преку работењето на јавните претпријатија, до реализацијата на општинските програми во различни области во првата половина од 2026 година.
Меѓу првите точки се годишните извештаи за работата и материјално-финансиското работење на охридските основни и средни училишта за учебната 2025/2026 година, како и годишните програми за работа за новата учебна 2026/2027 година. На дневен ред се и извештајот и годишната програма на детската градинка „Јасна Ристеска“, како и прашања поврзани со формирањето паралелки со помалку ученици од законски утврдениот број.
Советниците ќе разгледуваат и планови за вработување за 2027 година во повеќе општински јавни претпријатија – „Нискоградба“, „Билјанини Извори“, „Охридски Комуналец“, „Водовод“ и „Градски гробишта“, како и планот за вработување во Општина Охрид. На дневен ред се и извештаите за работењето на јавните претпријатија во вториот квартал од 2026 година.
Значаен дел од седницата се и извештаите за реализацијата на општинските програми од 1 јануари до 30 јуни 2026 година. Ќе се разгледува реализацијата на програмите за туризам, локален економски развој, заштита на животната средина и природата, култура, спорт и рекреација, млади и невладини организации, како и програмите од областа на образованието, детската, здравствената и социјалната заштита.
На дневен ред се и повеќе точки поврзани со комуналната и патната инфраструктура – јавната чистота, парковите и зеленилото, јавното осветлување, одржувањето и заштитата на локалните патишта и улици, сообраќајната сигнализација, уредувањето на градежното земјиште, како и реализацијата на програмите за изградба и реконструкција на локални патишта и улици.
Советниците ќе го разгледуваат и извештајот за остварувањето на Буџетот на Општина Охрид за периодот од 1 јануари до 30 јуни 2026 година.
Меѓу позначајните точки се и студијата за утврдување на оправданоста на моделот за управување со адреналински парк во Охрид, предлогот за изменување и дополнување на одлуката за општински линиски превоз на патници, како и предлог-одлуката за определување земјиште за кампирање.
На дневен ред се и повеќе урбанистички прашања, вклучително и измени и дополнувања на развојната програма за изработка на урбанистички планови за периодот 2026-2028 година, иницијативи за експропријација на градежно земјиште, технички исправки и урбанистички проекти со план за парцелација.
Седницата е закажана за 31 август во 9 часот, а пред советниците ќе се најде еден од пообемните дневни редови со кој ќе треба да се разгледаат прашања од повеќе области од работењето на локалната самоуправа.