Во среда, 24 декември, на периферијата на Белчишкото Блато, во близина на селото Белчишта, ќе се реализира теренска еколошка акција за садење нативни дрвенести садници, како конкретна мерка за превенција од пожари и заштита на чувствителните природни подрачја.
Во активноста ќе учествуваат ученици од Основното општинско училиште „Дебрца“ од Белчишта и од ОУ „Кочо Рацин“ од Охрид, заедно со претставници на Општина Дебрца, локалната самоуправа, противпожарните служби и граѓански организации.
Целта на акцијата е младите директно да се вклучат во грижа за природата преку практична работа на терен, со воспоставување еколошки противпожарни појаси, кои претставуваат важна мерка за превенција од пожари и заштита на биодиверзитетот во чувствителните зони околу Белчишкото Блато.
Активноста се реализира во рамки на програмата финансирана од Швајцарската агенција за развој и соработка – Swiss Development and Cooperation (SDC) и иницијативата Landscape Fire Management – Western Balkans, имплементирана од „Фармахем“. Проектот „EcoFire Youth Ambassadors – Интеграција на управување со пожари, наследство и одржливост на Охридското Езеро“ го реализира Здружението за екологија „Екоменлог“ од Охрид.
Со садењето на нативните видови се придонесува кон намалување на ризикот од пределски пожари, стабилизација на почвата и долгорочна заштита на природните вредности, а воедно се јакне и еколошката свест и одговорност кај младите.
Како дел од проектните активности, паралелно со теренската работа се развива и мобилната апликација „EcoFire Youth“. Апликацијата е наменета за млади и граѓани кои сакаат активно да се вклучат во превенција од пожари и заштита на природата, преку едукација за пожарни ризици, пријавување на потенцијални опасности и пожари, како и учество во локални еколошки иницијативи.
„EcoFire Youth“ е веб-апликација што може да се користи директно преку мобилен телефон, без преземање од продавници за апликации, и претставува современа алатка за поврзување на младите, наставниците и пошироката јавност со конкретни активности за превенција и навремено реагирање.
