Неверојатно е за какви незначителни причини се случуваат караници, тепачки и се вадат ножеви.
Караница и изваден нож за закана неодамна се случила на локалниот пат кон селото Велестово. 48 годишен жител на селото, на патот предизвикал караница и со нож му се заканувал на 57 годишен жител на селото Рача. „Велестовско-рачанската“ случка за среќа била без фатални последици а велестовецот „заработил“ кривична пријава. Според соопштението од Канцеларијата за односи со јавноста при СВР Охрид, поради постоење основи на сомнение за сторено казнено дело „загрозување на сигурноста“, СВР Охрид поднесе кривична пријава против Г.К.(48) од охридското село Велестово.
-Пријавениот, казненото дело го сторил на десетти декември минатата година, околу 13 часот на локалниот пат кон селото Велестово. Револтиран што на патот бил запрен џип марка „Ленровер“ пријавениот кој со друго патничко возило се движел по локалниот пат, застанал и излегол од возилото по што започнал вербална расправија со А.А.(57) од селото Рача. Потоа, извадил нож со сечиво од околу триесеттина сантиметри и почнал да му се заканува, соопшти портпаролот на СВР Охрид, м-р Стефан Димоски.
Понатамошниот тек на настанот бил спречен од присутни граѓани кои, Г.К. го оттргнале на страна. Истиот, притоа фрлил со камен кон автомобилот на А.А. оштетувајќи го ретровизорот.