Туристичките потенцијали на Чешка и Северна Македонија, можностите за соработка и инвестиции, како и продлабочување на туристичката размена беа во фокусот на денешната промоција во охридската НУ Библиотека „Григор Прличев“.
Претставници на ресорните министерства за култура и туризам од двете земји, тур-оператори и хотелиери ги претставија богатото културно наследство, природните убавини, езерата, планините, гастрономијата и различните форми на културен и искуствен туризам.
Посебно внимание беше посветено на можностите за зголемување на туристичката размена и создавање нови партнерства меѓу туристичкиот сектор од двете земји.
Директорката на НУ Библиотека „Григор Прличев“, Христина Трпеска, пред присутните ги претстави активностите на установата за нејзино вклучување во културниот туризам. Беше прикажано видео посветено на Пчињското евангелие, најстарата книга што ја поседува библиотеката, датирана од крајот на XVI век.
Видеото е синхронизирано на пет јазици, а каталогот посветен на евангелието, покрај на македонски, е преведен и на англиски, германски и француски јазик.
Од двете страни беше изразена надеж дека оваа иницијатива ќе отвори простор и за идна соработка меѓу охридската библиотека и сродни библиотеки од Чешка.
Промоцијата беше придружен настан во рамките на официјалната посета на заменик-премиерот и министер за надворешни работи на Чешката Република, Петр Мацинка, на Северна Македонија и Охрид.
