На брегот на Охридското Езеро кај селото Оровник започна голема еколошка акција за чистење на плажата „Дебрца“, во која се вклучија институции, организации и активисти со заедничка цел – заштита на езерото.
Во акцијата учествуваа Општина Дебрца, АКВАТЕК Охрид, Воден Свет Преспа Охрид и СОС Балкан Медиа Охрид, кои со заеднички сили реагираа на алармантната состојба на терен. Долж брегот и во водата беа затекнати пластика, гуми, текстил и разновиден отпад, што претставува сериозна закана за биодиверзитетот на езерото.
Само во првиот ден беа собрани над 12 кубни метри отпад, што, како што посочуваат организаторите, е доказ дека со заедничка работа може да се постигнат конкретни резултати.
„Охридското Езеро е природно наследство на целото човештво. Наша должност е да го предадеме почисто отколку што го добивме“, порачаа организаторите.
Акцијата продолжува и во наредните денови, а веќе утре е најавено подводно чистење на езерското дно кај оваа плажа, што ќе се реализира за прв пат во Општина Дебрца.
Организаторите нагласуваат дека ова не е еднократна иницијатива, туку почеток на подолгорочен процес за уредување на овој простор. Плажата „Дебрца“ кај Оровник, со својата природна убавина и локација, има потенцијал да се развие во нова туристичка атракција.
Охридското Езеро, како светско природно наследство на УНЕСКО, останува обврска за заштита – не само на институциите, туку и на секој поединец.
