Со низа манифестации, денеска Охрид достојно го одбележа 7 ноември,денот на своето ослободување.
Денеска напладне, во општината се одржа свечена академија на која зборуваа градоначалникот Јован Стојаноски и Гоце Ѓорѓиески, претседател на ОС на борците од НОБ, по што следуваше богата пригодна културно уметничка програма.
Денеска,со пиетет го чествуваме овој голем ден и им оддаваме должна почит на сите храбри борци кои учествуваа во ослободувањето на Охрид, а особено на оние кои ги дадоа своите животи за слободата. Ние, како генерација сме одговорни да го почитуваме она што со крв е спечалено, да ја чуваме слободата и независноста и да ја развиваме сопствената држава. Херојските подвизи на борците против фашизмот, нека ни бидат завет дека никогаш нема да ги заборавиме и дека нам и на идните поколенија ќе ни бидат инспирација за надминување на препреките во чекорењето по патот за попросперитетен Охрид.По ослободувањето на Охрид од фашистичкиот окупатор, еден од најсветлите историски датуми од поновата историја на нашиот древен град, забрзано почна да се одвива нов развоен период.Охрид стана современ економски,културен и туристички центар.Беше еден од градовите со највисока стапка на вработеност, но и туристичка дестинација во која постојано растеше бројот, особено на странските гости. Со ставањето на охридското културно и природно наследство под заштита на УНЕСКО, се отвори и нов процес за промоција на нашите реткости во светот.Сето тоа ја наметна потребата за креирање на одржлив економски развој, определба, која за жал, не секогаш, беше почитувана. Ве уверувам дека ние, новата Локалната самоуправа како одговорна власт, макотрпно и посветено ќе работиме, врз темелите на досега направеното, постојано да надградуваме нови дела кои ќе остават белег во современиот развој на Охрид. Ќе работиме на подобрување на условите за живеење на граѓаните, ќе инвестираме во инфраструктурата,во образованието, културата, економскиот развој и другите области, а посебно на промоцијата на Охрид, како атрактивна туристичка дестинација.Верувам дека чествувањето на денешниов ден, ќе ни биде инспирација за реализирање на ветеното за подобра иднина на Охрид. Овој ден ќе остане вечен паметник за сите идни генариции, за да се слават сите оние кои во херојската антифашистичка епопеја, го остварија идеалот на многу генераци охриѓани да живеат во слобода и да градат подобра иднина.Дозволете ми уште еднаш да Ви го честитам празникот -Денот на ослободувањето на Охрид и да посакам да ни биде вековит- рече градоначалникот Јован Стојаноски.
Претседателот на Општинската организација на Сојузот на борците од НОАВМ од општините Охрид и Дебрца Гоце Георгиески рече дека на олтарот на слободата на нашиот град, останаа на вечна стража четириесетина храбри борци, а шеесетина беа ранети. Кон нив, како што рече Георгиески, треба да се однесуваме со почит и респект.Сега кога имаме слободен Охрид и самостојна македонска држава, нашата најголема одговорност е да не дозволиме нивните жртви да станат залудни. Храброста се покажува тогаш кога треба да се даде животот за својата татковина, но храброста се покажува и тогаш кога треба да се покажува и тогаш кога треба да се преземе одговорноста и да се работи во полза на нејзината иднина.
Минатото го паметиме, историјата ја почитуваме, иднината ја градиме. Само решително и сложно, единствени, сплотени и обединети, со добри намери и јасна заедничка цел, лесно ќе успееме да го најдеме патот до неа. Патот до модерна, перспективна и европска Македонија, патот за Охрид, како подобро место за живеење за сите граѓани- рече Георгиески.
Свеченостите по повод одбележувањето на 7. Ноември- Денот на ослободувањето на Охрид започнаа со полагање на свежо цвеќе на спомен обележјата од Народоослободителната и антифашистичката војна во Македонија.Делегации на општина Охрид, политичките партии и невладините организации положија свежо цвеќе во Спомен-паркот на Револуцијата, спомениците на паднатите борци во градските гробишта, спомен бистите на Петре Пирузе пред Основниот суд, на Мите Богоевски во дворот на СОУС „ Св. Кирил и Методиј“ и на спомен бистите на Андон Дуков и Спас Банџов во градскиот парк.
7 ноември, денеска го одбележа и Јавното претпријатие „ Охридски комуналец“. На свеченоста, на која присуствуваше и градоначалникот за успешното работење на претпријатието и идните задачи зборуваше в.д. директорот Александар Китески. Градоначалникот Јован Стојаноски им се заблагодари на вработените и раководството за посветената работа во одржувањето на јавната чистота и другите комунални активности во градот и приградските населби, а на двајца вработени за поминати триесет години во претпријатието им врачи награди.
Денеска, свечено беше пуштен во употреба реновираниот објект „Развигорче“ на ЈОУДГ „Јасна Ристеска“. Градинката, денеска во 17 часот, својот патронен празник ќе го одбележи со свечена приредба што ќе се одржи во СРЦ „Билјнини извори“.Чествувањето по повод 7 ноември денот на ослободувањето на Охрид, ќе биде заокружено со свеченост во 19 часот, поврзана со воведувањето бесплатен курс за изучување на рускиот јазик во ОУ „Христо Узунов“, во соработка и помош од почесниот конзулат на Руската Федерација во Охрид.