Повозрасен охриѓанец, со својот автомобил се обидел да прегази полицаец кој сакал да го запре бидејќи се движел во спротивна насока.
Со филмски скок во страна, полицаецот се спасил а возачот „храбро“ избегал од местото на настанот.Полицајците го пронашле и за стореното „дело“ го наградиле со кривична пријава.Според соопштението од Канцеларијата за односи со јавноста, поради постоење основи на сомнение за сторено казнено дело „напад на службено лице при вршење на работи од безбедноста“, Секторот за внатрешни работи Охрид поднесе кривична пријава против Б.С. (64) од Охрид.
-Пријавениот, казненото дело го сторил на 14-ти минатиот месец околу 09 часот на кеј „Македонија“ во Охрид каде го управувал својот патнички автомобил марка „Фолксваген Пасат“ по еднонасочната улица но во спротивен правец. Забележувајќи го прекршокот, униформираниот полициски службеник на возачот му дал соодветен знак да го запре автомобилот. Наместо тоа, пријавениот Б.С. го насочил автомобилот директно кон него и значително ја зголемил брзината на движење. Во следниот момент, полицискиот службеник отскокнал во страна и така успеал да го одбегне ударот од автомобилот по што возачот избегал од местото на настанот, изјави портпаролот на СВР Охрид, Стефан Димоски.