Утре (19.02.2026 година) со почеток во 10 часот, во ООУ „Кочо Рацин“ Охрид ќе се одржи показна вежба за евакуација по сценарио за случен земјотрес и давање сигнал за општа опасност.
Вежбата ќе се реализира по однапред утврдено и разработено сценарио изготвено од отсекот за превенција при СВР Охрид и Црвен крст Охрид. Со сценариото се запознаени учениците и наставниците, како и институциите што ќе учествуваат во симулацијата – Регионалниот центар за управување со кризи, Општинскиот инспекторат за образование, Територијалната противпожарна единица Охрид, Итната медицинска помош и други надлежни служби.
Целта на вежбата е превентивна – подигнување на степенот на безбедност и подготвеност кај учениците и наставниот кадар за поефикасно постапување при земјотреси и други елементарни непогоди.
Показната вежба се спроведува согласно плановите за заштита и евакуација при несреќи и за работа во вонредни услови.
За време на одржувањето на симулацијата, полициски службеници од СВР Охрид привремено ќе ја затворат за сообраќај улицата „Новопроектирана“, која поминува низ охридската касарна.