Денес православните верници го празнуваат споменот на светите маченички Вера, Надеж и Љубов и нивната мајка Софија – светителки чиј живот и страдање остануваат сведоштво за непоколебливата вера, љубовта и надежта во Бога.
Софија била благочестива христијанка која своите три ќерки ги воспитувала во христијанскиот дух и во верата во Господ Исус Христос. На своите деца им ги дала имињата Вера, Надеж и Љубов, според трите христијански добродетели.
Според црковното предание, во времето на царот Адријан, Софија и нејзините ќерки биле изведени пред властите и принудувани да се откажат од христијанската вера. Трите сестри, иако биле многу млади, останале непоколебливи и ја исповедале својата вера.
Поради тоа претрпеле маченичка смрт. Мајката Софија останала покрај нив и по нивното страдање, молејќи се и благодарејќи му на Бога за нивната храброст и вера.
Празникот потсетува на трите вечни христијански добродетели – верата, надежта и љубовта, кои, како што сведочи Светото писмо, остануваат темел на христијанскиот живот.
Нека празникот на светите Вера, Надеж, Љубов и мајка им Софија донесе мир, здравје, духовна сила и благослов во домовите на сите верници.
За многу години празникот!