Во родното Велгошти, утре вечер ќе се одржи традиционалната културна манифестација „Вечер на Живко Чинго“, посветена на ликот и творештвото на еден од најзначајните македонски раскажувачи, романописци и драмски автори.
Манифестацијата ќе се одржи на 13 август, со почеток во 20 часот, во атарот на црквата „Света Петка“ во Велгошти. Организатори се Општина Охрид, ООУ „Живко Чинго“ и Месната заедница Велгошти.
Програмата предвидува полагање цвеќе пред спомен-обележјето на Живко Чинго, обраќање на претставник на Општина Охрид, како и доделување на наградата за најдобар расказ и кратко обраќање на добитникот на наградата, д-р Марјан Патлиџанковски.
За творештвото и значењето на Живко Чинго ќе беседи академик Катица Ќулавкова.
Културно-уметничкиот дел од програмата е насловен „Македониум“, а ќе настапат повеќе музичари и изведувачи: Бојан Маркоски на хармоника, Стефан Чеменковски на кларинет, Ѓоко Чеменковски – вокал, Владимир Србиновски на пијано, Виктор Србиновски и Ристе Довлев на виолина, Величе Затуроски на клавир и Димитар Трпеновски на кахон. Како рецитатори ќе настапат Софија и Виктор Милески.
Во рамки на програмата ќе настапи и КУД „Илинден“ од Велгошти.
„Вечер на Живко Чинго“ е традиционална манифестација која со години го чува споменот на авторот и ја афирмира македонската книжевност, особено раскажувачката форма. Манифестацијата традиционално се одржува во неговото родно Велгошти. (Ohrid.gov.mk – Ohrid.gov.mk)
Живко Чинго почина на 11 август 1987 година, на 51-годишна возраст. Неговото книжевно наследство го сочинуваат, меѓу другото, збирките „Пасквелија“ и „Нова Пасквелија“, романите „Сребрени снегови“ и „Големата вода“, како и бројни раскази и драмски текстови. (Ohrid.gov.mk)
Манифестацијата „Вечер на Живко Чинго“ ќе започне утре, 13 август, во 20 часот, во атарот на црквата „Света Петка“ во Велгошти.