Вчера беше промовирано македонско-англиското издание „Охридски преданија од иднината“, книга која преку научно-фантастични раскази го претставува Охрид во едно поинакво, футуристичко време.
Инспирирана од охридските преданија, културното наследство, езерото, археолошките локалитети, традициите и соживотот, книгата ги спојува минатото и иднината во уникатна книжевна целина. Во расказите се преплетуваат мотиви од вештачката интелигенција, роботиката, холографијата и современите технологии со локалните легенди и богатата културна меморија на градот.
Авторскиот концепт има за цел да го прикаже Охрид не само како град со славно минато, туку и како место со сопствена визија за иднината – град што памети, создава и раскажува нови преданија за генерациите што доаѓаат.
Покрај книжевната вредност, изданието е замислено и како културен сувенир и промотивен материјал што ќе го доближи Охрид до меѓународната публика. Со паралелниот текст на македонски и англиски јазик, книгата претставува мост меѓу локалната традиција и глобалниот читател, отворајќи нов простор за промоција на охридското културно наследство преку современи книжевни форми.
