Не се исклучува можноста денешната дискусија да биде исцрпена и да има гласање.
Пратениците во македонското Собрание денеска треба да ја продолжат расправата за потребата од уставните измени. Бидејќи опозициските пратеници претходно ги откажаа дискусиите а за дискусија се пријавени уште петнаесеттина пратеници, повеќето од нив од парламентарното мнозинство. не се исклучува можноста дискусијата да биде исцрпена и да се пристапи кон гласање. И понатаму е нејасно дали во Собранието ќе биде обезбедено двотретинско мнозинство, колку што е потребно да се пристапи кон уставните измени како една од обврските од Договорот од Преспа.
– Верник сум, верувам во чуда, па и во двотретинско мнозинство – изјави вчера премиерот Зоран Заев и уште еднаш ги повика пратениците од опозициската ВМРО-ДПМНЕ да дадат поддршка на Договорот од Преспа и да ги поддржат уставните измени.
Од друга страна, од ВМРО-ДПМНЕ порачаа дека се единствени и дека нема да поддржат промена на Уставот со цел промена на уставното име на државата.