За Роман – за храброста, за животот, за надежта
На 19 јули, Антонио Пандовски ќе се впушти во несекојдневен спортски и хуман подвиг – ќе трча на релацијата Струга – Охрид – Свети Наум, а потоа повторно назад преку Охрид до Струга, носејќи силна порака за надеж, истрајност и човечност.
Во делови од патеката ќе му се придружи и Нела Стојанова, која со своето учество ќе даде дополнителна поддршка на оваа благородна мисија.
Овој подвиг е посветен на малиот Роман – дете чија животна борба секојдневно сведочи дека силата на духот нема граници. И покрај петте тешки дијагнози со кои се соочува, неговата храброст, насмевка и силна волја за живот претставуваат инспирација за сите.
Минатата година, Роман беше дел од „Дрим Ран“, трката организирана од Нела Стојанова, каде со своето учество ги освои срцата на сите присутни. По тешка операција и долг процес на рехабилитација со помош на роботска технологија, тој повторно успеа самостојно да прооди – по третпат во својот живот.
Најубавата вест е што и оваа година Роман повторно ќе застане на стартот на „Дрим Ран“ и ќе трча, испраќајќи моќна порака дека не постојат невозможни битки кога постојат волја, љубов и поддршка.
Ова трчање не е само спортски подвиг. Тоа е поклон пред едно храбро дете, пред неговата борба и пред сите кои веруваат дека секој чекор – без разлика колку е тежок – вреди да се направи.
За Роман. За сите мали и големи херои. За надежта што нè движи напред.