Компаниите од здравствениот сектор, членки на Сојузот на стопански комори на Македонија, најостро ги осудуваат наводите за евентуално вршење нелегални медицински третмани и употреба на недозволени препарати.
Во нивната реакција се наведува дека ваквите дејствија, доколку се потврдат, претставуваат сериозно нарушување на медицинската етика, закана за здравјето на пациентите и поткопување на довербата во здравствениот систем.
Од ССКМ апелираат на целосно, транспарентно и одговорно постапување од страна на институциите, со цел утврдување на сите факти и преземање соодветни мерки согласно законската регулатива.
Истовремено, се потенцира дека мора да се почитува и принципот на презумпција на невиност, сè до официјално утврдување на евентуалната одговорност.
Компаниите нагласуваат дека остануваат цврсто посветени на заштитата на пациентите, унапредување на професионалните стандарди и почитување на највисоките етички норми, со јасна определба за нулта толеранција кон злоупотреби во здравството.
Воедно, се бара засилен надзор и системски мерки за превенција, со цел спречување на вакви појави во иднина, а од надлежните институции се очекува навремено и одлучно постапување, како и редовно и транспарентно информирање на јавноста за текот на постапката.