Театар Вортекс од Скопје со претставата „Кокошка“ гостува во Охрид

Театарската претстава „Кокошка“, според текст на рускиот драматург Николај Кољада, на 25 ноември ќе биде изведена во Охрид. Гостувањето на Театар Вортекс од Скопје е закажано во малата сала, со почеток во 20 часот.

Режијата е на Теодора Силјаноска, а во претставата играат Биљана Драгиќевиќ-Пројковска, Ане Блажовски, Ванеса Тримчевска, Томе Станковски и Кристина Гиева.

„Кокошка“ ја истражува потребата за слобода, копнежот и страста да се сака и сонува, дури и кога светот станува студен и апатичен. Преку комедија на апсурдот, импровизација и анализа на извитоперените вредности, суетата, лековерноста и моралната искривеност, актерите го создаваат светот на ликовите пред очите на публиката.

Во срцето на претставата е младоста, претставена како немирна и искрена сила, гладна за промени, која се судира со навиките, рамнодушноста и стравот. Преку играта, ликовите се обидуваат да се справат со внатрешниот хаос и со непредвидливоста на светот околу нив.

Костимографијата е на Марија Пупучевска, соработник за сценски движења е Дарко Велиќ, додека изборот на сценографијата и музиката е на Теодора Силјаноска. Дизајнот на плакатот е на Михаил Велески, а фотографиите се на Луција Спасевска.

Влезниците чинат 300 денари и се продаваат на билетарницата. Таа работи секој работен ден од 10 до 17 часот, како и на денот на изведбата од 13 до 20 часот.

Независниот театарски проект е реализиран со поддршка на Министерството за култура и туризам, Прилепска пиварница, Bonanca Urban и Кораб Трница.

Social profiles

Охрид

Струга

Вевчани