Со свечено затворање заврши 41. издание на Уметничката колонија „Дебрца“, која и оваа година ги обедини домашните и странските уметници во духот на креативноста, инспирацијата и културната размена.
Во текот на колонијата, учесниците создадоа бројни ликовни дела во работна и инспиративна атмосфера, а покрај творечкиот процес имаа можност да се запознаат и со културното, историското и природното богатство на општина Дебрца и Охридскиот регион.
Во рамки на програмата беа организирани посети на Музејот на Дебрца и манастирот „Сите Светии“ во Лешани, како и ликовно творење на отворено во стариот дел на Охрид, каде уметниците црпеа инспирација од староградската архитектура, калдрмите и препознатливите охридски пејзажи. Програмата беше збогатена и со посета на Билјанините Извори и пловидба по Охридското Езеро.
Организаторите упатија благодарност до сите учесници за нивниот придонес, професионалност и творечка енергија, како и до институциите, соработниците и поддржувачите кои помогнаа во успешната реализација на годинашното издание.
Со завршувањето на 41. Уметничка колонија „Дебрца“ продолжува повеќедецениската традиција на една од најзначајните културни манифестации во регионот, со најави за нова средба на 42. издание следната година.
