Независниот синдикат на полицијата бара еднократно покачување на платите за 20 проценти од јануари 2019 година наместо зголемувањето на платите што го најави министерот за внатрешни работи кое, според синдикатот, ќе изнесува од 400 до 700 денари.
Околу 3.000 полицајци можe да штрајкуваат ако нивните барања не се прифатат. Заканата доаѓа од Независниот полициски синдикат. За синдикалците, задоволен од ситуацијата во полиција е само министерот.
– Наближува времето кога во Собранието на Република Македонија треба да се достави Предлог-буџетот за 2019 година. Затоа наместо срамното покачување од 400 денари по полицаец, бараме за сите вработени во Министерството за внатрешни работи еднократно покачување на платите за 20 проценти од јануари 2019 година, изјави денеска портпаролот на синдикатот Дејан Саздов пред Министерството за внатрешни работи.