Февруари, месецот посветен на подигнување на свеста за ретките болести, годинава започнува со нови податоци и активности од Здружението „Ретко е да си редок“. Во нивниот неофицијален регистар досега се евидентирани 408 различни ретки дијагнози.
Претседателката на здружението, Гордана Лолеска, вели дека зад секоја бројка стои човечка судбина и потреба од видливост и поддршка.
„Нашиот неофицијален регистар веќе брои 408 различни дијагнози. Тоа не се само бројки, туку наши сограѓани кои заслужуваат да бидат видливи“, истакнува Лолеска.
Таа информира дека во рамки на осмата сезона од националната кампања „Ги запознаваме ретките болести“, заклучно со февруари, јавно ќе бидат објавени 215 прецизно обработени дијагнози, достапни на македонски и албански јазик.
Активностите официјално започнуваат на 1 февруари, а од здружението повторно упатуваат повик за вклучување на стручни лица, волонтери и поддржувачи во борбата за подобар и подостоинствен живот на лицата со ретки болести.