Градоначалникот на Општина Дебрца во општинските простории оствари средба со почесниот конзул на Македонија во Перт, Австралија, Зоран Ќосески.
На средбата се разговарало за улогата на македонската дијаспора и нејзиниот придонес во развојот на татковината, како и за можностите за понатамошна соработка. Од Општина Дебрца истакнуваат дека Ќосески со години ја покажува својата поддршка за општината преку хуманитарни активности и донации, меѓу кои и за учениците од ООУ „Дебрца“ и за локалната самоуправа.
Градоначалникот му изразил искрена благодарност за неговата посветеност, континуираната поддршка и заложбите за зачувување на македонскиот идентитет и зајакнување на врските со иселениците.
Од Општина Дебрца порачаа дека остануваат посветени на негувањето на добрата соработка со македонската дијаспора и реализацијата на идни заеднички проекти, истакнувајќи дека вратите на општината секогаш ќе бидат отворени за пријателите и поддржувачите на Дебрца.